咖啡立吉












奶奶同Josephine都需要差差電，本來吉祥寺都有Starbucks，但我地寧願試試當地特色咖啡店，結果就步入呢間"黑店"。









咖啡店非常懷舊feel，裡裡外外都好似時光倒流幾十年前咁；但最最"特別"既係，店內舊報紙一堆堆，待洗杯碟更堆積如山!!!(請注意counter上的杯碟)

















店主係一位麻甩伯父，只見我地點左飲料後，佢就一直努力地響sink盤洗杯......唔通唔洗杯的話，真係連盛咖啡既新杯都無？雖然大家都O晒咀心感不妙，但既然坐低左，唯有硬住頭皮繼續等。

500 yen一杯既冰咖啡，味道普通而且極細杯，搵笨指數爆標。雖然個老細都好似開間咖啡屋黎過日神娛己娛人，但收得呢個價錢都唔可以咁欺場吧。

悠閒吉祥寺

首日到達東京得半日時間，血拼嫌到喉唔到肺，所以坐JR中央線到附近住宅區吉祥寺。

之前黎過兩次，感覺比較悠閒。尤其是穿過0101百貨右側，通往井之頭公園既小道，兩旁特色小舖林立。

舖頭門口裝假狗？哈哈。

雖然香港都有Marion Crepes(法式可麗餅)，但始終都係日本原裝正貨好食d，而且整餅既都比香港pro好多。我點左"春之新Menu"既"抹茶布丁黑蜜之和風Crepe"(餡料包括：手作抹茶布丁，小倉紅豆，白玉，黑蜜及生cream)[450 yen]

店面細細，但隔離有個甚好feel既木板sitting area比我地慢慢享用即製crepes，吹住涼風甚爽!!

小路盡頭落去，就係有名既井之頭公園。春天賞櫻既景點；湖畔甚多日本種既細葉楓樹，秋天黎賞紅葉都應該不賴吧。

湖中有傳統天鵝舟，中亭有一表演台供遊人即興表演......如果睇過最近既日本電影"咕咕貓咪"，一定對呢度唔陌生。

北澤俱樂部

既然住新宿西口，好難唔去探探極新鮮美味既迴轉壽司店北澤。

長到橫誇整隻碟既鱈場蟹腳壽司

極上海膽，creamy到似雪糕

巨型帶子兩吃

活車海老，新鮮由魚缸捉上黎極速脫殼，上碟時蝦肉仍在飯面上晃動

穴子魚(海饅)，中拖羅

鹽燒巨型海螺

老闆送既麵豉湯

京王酒店

雖然成日住新宿西口，但次次都係隔離既Kadoya Hotel，呢間香港旅行團聞名既Keio Plaza反而大鄉里地第一次入住。

大堂同裝修當然grand好多啦，而且撞口撞面都係香港人。

窗口對正東京都廳，個view不俗。

鐵路便當

呢次東北之旅搭火車次數唔少，但只食到兩次心愛既鐵路便當，而且仲要係餐與餐之間硬涉落去既"snack"。

所以只有叔叔我在發功，其他團友都無食過呢d地方特色美食。

東京-->仙台：依達幕便當(1100 yen)

設計如sampler一樣，有點似過年既全盒；佢地稱此為"九曜紋"，源自仙台名將依達政宗。便當內甚至有單張詳細列明每款食物既由來，畫圖同實物如出一徹，非常講究：宮城白米，仙台味噌燒三文魚配魚籽，免治雞肉棒，牛肉野菜卷，三色辛子醃地場青菜，味噌煮鯛魚，枝豆蓉白玉團子，帆立貝南蠻漬，凍豆腐煮物，同埋依達玉子卷。



豬苗代-->東京：栗山菜便當(800 yen)

其實剛食完早餐，頗飽，所以揀左個清淡既便當。主打係大大粒既栗子，醃山菜加日本味飯。雖然係齋，但都好美味；日本米真係齋食白飯都特別滋味。












最利害係便當招紙，連製造時間都列得一清二楚。

雖然仙台站都見到有極吸引既厚切牛舌麥飯三文治便當，同埋頗攪野，底部有加熱板頗有陶板燒風味既牛舌便當，但因為經過時實在太飽，叔叔我都唯有望門輕嘆，無緣品嚐。

豬苗代Herb園

Check-in後差不多5pm，行李都唔得閒上房，就放低concierge趕去隔離既唯一景點：Herb園(5pm Last Entry)。

呢期既主題係"Lavender Festival"，初初入內見到好似花店咁得幾盤奀茄，心諗：賴野，唔係就係咁fa？

好彩出到戶外，大片薰衣草田在眼前；雖然同北海道既富良野無得比，但唔駛入場費，都算係咁啦。

當然好老土地擺個"人比花嬌"pose......

花田中屹立十二生肖巨型木雕，與花田有點唔搭，但都幾特別。

土產店有售薰衣草軟雪糕，奶味太重蓋過薰衣草，唔及香港既XTC。

豬苗代如果唔係滑雪愛好者，黎一次就夠喇。

溫泉旅館之四：Hotel Listel豬苗代

到達溫泉之旅最後一站：豬苗代。一到車站，酒店已經有van等緊我地。
雖然只係短短幾分鐘車程，沿路一望無際都係稻田，唔知呢度食日本米會否新鮮d呢？
酒店外觀頗宏偉，大堂都係好洋式既grand。山坡附近既滑雪道同吊車設施睇黎，冬天應該係一個規模龐大既Ski Resort。但酒店附近除左一個Herb Garden外就極荒蕪，莫講話溫泉街，真係連人影都唔多個。
酒店大堂有Soyjoy既售賣機，趣呀!!












房間及窗外風景









最最剎風景既係，撞正兩團"東瀛游"!!!晚飯時聽到廣東話多過日文，阿Joe甚至被導遊誤認團友兩次。

晚餐buffet不甚麼樣，連賣點既每人三大隻唔同煮法帶子都好睇唔好食；以草莓果醬伴帶子刺身感覺好怪。
更老土既係，明明有個室內大游泳池樂園，但要另收入場費不特止，而且仲索價3000 yen；就算酒店住客減價2000 yen都係勁貴，所以帶左泳衣泳帽都無用武之地。

因為近山邊多樹，入夜後走廊窗外差不多係"蜘蛛博覽"；攪到我地連飯後露天風呂都唔敢出去浸，寧願室內浸大浴場。

米澤牛

離開山形縣時，於車站內都見到有數棵車里子樹。
前往福島縣途中會經過盛產和牛既米澤，既然有rail pass，當然停一停大快朵頤。一到米澤，先有隻巨大黑牛迎接我地，size同華爾街既有得揮。另外，NHK大河劇由妻夫木聰主演既"天地人"都響呢度取景，所以到處可見"天地人"既宣傳，同埋古裝主角造型。












出到黎問左車站information，選定其中一間附近有名既米澤牛食店黎個奢侈午餐。









餐廳外表古樸，但內裡裝修簡單；牆上當然唔少得本店主打既米澤牛海報啦。









除左我同奶奶之外，其餘人等都點左雪花非常，入口即溶既米澤牛shabu shabu(2900 yen)。米澤牛甚少出口，數年前曾經響銀座品嚐過，但當其時差不多1000 yen一片，而且仲無咁大塊，感覺就如食銀紙。大家見到呢碟油脂均勻，粉紅鮮嫩既雪花和牛，都爭相同碟牛合照。









我同奶奶則點左較有咬口既和風Steak定食。雖然外型相約，我既larb steak較平，150g都要3500 yen；而奶奶既牛柳更加"極品"(5600 yen)。切好晒一條條，可以用筷子夾起黎送飯。雖然牛扒因為其厚度唔能夠用入口即溶黎形容，但肉質稔而有牛味(死!學埋黃麗梅講野添)。









返香港有排都唔會食牛扒，免得比下去。

溫泉會席料理

4間溫泉酒店中，只有藏王唔係食buffet，而係預訂左較有溫泉風味既會席料理(因為會席料理既一泊兩食價錢較貴，奶奶設想到4晚溫泉，如果晚晚食會席料理可能旅費會太高昂)。

雖然唔係房內而係去餐廳食，但我地6個近住個火爐自成一角，都算cozy。

會席料理一向都係樣樣都有d，就算未必款款岩胃口，但其精緻度係自助餐不能比：

藏王之玉手箱(漬物)

三文魚山菜味噌燒，野菌厚燒玉子，虹鱒魚甘露煮，炸湯葉(腐皮)，車里子芝士球

虹鱒/鯉魚刺身

藏王牛/高原野菜陶板燒

炊物：魚肉饅頭

山形田舍蕎麥麵

山形薯仔煮(田舍鍋)

超多料既味噌湯及甜品

藏王溫泉街

登山後落黎，當然唔會放過土產店啦。

其實舖頭唔算太多，但游人欷少可以遊閒地逛。









其中一間比較大規模既土產店，發現有"藏王大吟釀"(日本酒)造既雪糕，當然唔會放過大家坐低整番杯；酒味唔濃，反而有點乳酪味。店外老板娘免費設有足溫泉供遊人使用，雖然係路邊，但非常乾淨，當然二話不說脫鞋浸個數分鐘爽一爽。

行到邊食到邊，路過一見合心水小食都唔會放過：

山形縣除左車里子，啤梨都好出名；清香既啤梨啫哩。

用100%藏王牛肉同北海道男爵薯，即叫即炸脆爆既牛肉Croquette。

越行上山，路旁不時會傳出硫磺味，而且見唔少古舊既共同浴場；雖然山上有"露天大浴場"，但因已開始日落，所以無緣昅野，返去準備個肚迎接豐富晚餐。

鳥兜山

吊車程只係十來分鐘，已經到達海拔1387米高既鳥兜駅。

車站既職員，可能整日多見樹木少見人，見到我地幾名茂李登山，應該好興奮，哈哈。站內有一清楚圖像，顯示整個地區的五個溶岩出口；而鳥兜山就係爆裂前既滝山山脊，爆裂山塌後就出現鳥兜山同藏王溫泉。而幾個山頭後既名景點，火山口湖泊"藏王御釜湖", 因為每日只有一班大清早的巴士前往，所以我地就唔到時間去。

山上勁大風，真係吹到披頭散髮。

車站旁有條小徑上去大黑天展望台，其實只係尊石造既招財佛。

好彩今日天公造美，如果好似早兩日落雨的話，一定又凍又狼狽。

藏王中央Ropeway

由酒店徒步行到溫泉街，就見到中央吊車站。

放眼望去，山上有好多條滑雪道，冬天時應該係個好大既ski resort吧。既然天朗氣清，一於比1200 yen買個來回吊車票，上山吹吹風。

因為是日無乜遊客，整架吊車我地6個人包晒，爽!!雖然外面風好大，但架吊車開行時非常靜同穩，越往上爬，望落去越覺得風景似瑞士；阿Joe差不多要高唱"飄零燕"添。

而中左"韓版花樣"毒既Connie，就猛話似韓版道明寺同杉菜首次約會被困一整晚既南山吊車；哈，咁我地駛唔駛拿把cutter黎塗個鴉？

木之風呂

雖然間hotel頗hip，但個風呂卻好特別地整個用原木黎建造；好有spa既味道。









奇怪在，乜d木日浸夜浸唔會腐爛既咩？原來奶奶解釋，有一種檜木係耐浸的，只係成本頗高。

風呂外有一足溫泉，露台式對住玻璃窗，甚有風味。












下面既相，係我朝早見無乜人冒死入內偷拍既；佢地話反正我都係冒死，不如入男湯拍喎，哇哈哈，如果被發現，我怕會被控偷竊罪喎。

七夕的善存廣告

新曆7月7號係日本人既七夕，傳統會於竹樹上掛滿寫上願望既彩紙。

既然酒店大堂有得比客人即寫即掛，我都唔執輸，黎個善存slogan。

唔知除左我地6個之外，仲有無香港客會見到呢？

溫泉旅館之三：藏王國際酒店

一個小時巴士登山，到達藏王溫泉(ZAO)。

半山空氣果然格外清新。入住既藏王國際酒店，有別於傳統溫泉旅館，翻新過裝修得頗有hip hotel既味道。房內更有Sony Bravia LCD電視，日本酒店甚少見。

窗戶靠山溪，綠葉流水，甚好feel。

速食@山形駅Skylark

離開宮城縣，我地向鄰近山形縣出發。

一到山形駅，首先就見到站內已經大賣呢個縣既特產：車里子。一般香港食既都係紅肉，而呢度產既車里子係黃肉既，而且唔會太甜，比較清香。





響未坐通往藏王溫泉既巴士之前，先在站內既速食西餐廳Skylark黎個快餐。
暴食左幾日既我，點左比較清淡既野菌雜炊[即係加左蛋既日本粥](525 yen)。
其他女仕們都係叫比較健康既雞肉豆腐漢堡套餐(838 yen)，阿Joe一於懶理，向高卡挑戰，黎個鐵板迷你蛋包飯漢堡扒炸大蝦套餐(628 yen)。